بْیا اِت مِھتراں میریناں
ورناہ ءُ کماش پیریناں
لبزاں جَم کناں شیریناں
کْوھنیں کِسّھے گیریناں
نَزّیک ءَ کناں دیریناں
شیریں پُسّگ ءِ اے ھاک ئے
واھند ماڑی ءُ ھولاک ئے
تو چہ زَھم جناں پیداک ئے
نام ءِ واجہ ءُ زوراک ئے
ھمگام ھمسر ءُ ھم جاک ئے
راج ءِ سودا ءُ بیپاری
چُنت روچ ءَ کن ئے گَداری
ھر سَھت ءَ نہ بیت ھُژّاری
کَیت ءُ وھد ترا پیشداری
بیت تئی آکِبت سرگاری
مرچے تو سَتر آزات ئے
توک ءَ شَر کپ ءِ کورچات ئے
گون اَنت بد دعا چُنت مات ئے
انجام ءَ رَس ءِ باندات ئے
نام ءَ کَمبر ءِ ھَیرات ئے
دیم ءَ ھَمدل ءُ ھمراہ ئے
پُشت ءَ دژمن ءُ بَدواہ ئے
مرچی رونق ءُ رژناہ ئے
مال ءُ دولتانی شاہ ئے
لَٹّ ءَ نیست توار اللہ ئے
تو پہ ھَستی ءُ کَلدار ءَ
شِیکّل بوتگ ئے اے کار ءَ
آساں دؤر دئے بازار ءَ
پرما ئے دلاں کوکار ءَ
ھَرکس زانت تئی کِردار ءَ
جاھے نِشتگ ءُ پلگار ئے
جاھے سرجم ءَ آشکار ئے
جاھے مُتّبر ءُ سردار ئے
جاھے ساہ کُشیں گدار ئے
چِنچو تو وت ءَ چو دار ئے