ہرکجام قوم ءِ زبان بوتگ رواج پہ وانَگ ءَ
صرف ءُ نحو اِش جوڑ کت ءُ قانون لوطے زانگ ءَ
ملک ءِ سرکار ءَ وتی قوم ءِ زبان داتگ رواج
آ زبان دیم ءَ شتگ پہ قوم ملک ءِ مانگ ءَ
مئے بلوچانی حکومت چے قدر دیم شتگ
پر وتی قومی زبان ءَ بوت ءَ چو دیوانگ ءَ
وہدے ایرانی زبان فارسی بلوچ ءِ بوت زبان
وہدے سندھی بوتہ رہبر حاکم ءِ بت خانگ ءَ
اچ پدا احت اَت پرنگی ملک ءُ راج ءِ لُٹگ ءَ
دیم ءَ اردو پشت ءَ ون ٹو سکت زہگ چوں وانگ ءَ
ہر صدی ءَ یک زبانے جوڑ بیت ملک ءِ تہا
آ وتی ماتی زبان اِش کپ ات چو بیگانگ ءَ
باز بلوچانی تہا بوت ءَ سخی نام آوریں
ہم بلوچان زحم جتگ چو ر ستمء مستانگ ءَ
ہچ نہ بوت دلگوش وتی قوم ءِ زبان ءِ نیمگ ءَ
وانگ ءُ زانگ زبان ءِ پرشتگ ات چوشوانگ ءَ
نوں پدا مردے چہ راج ءَ دُرشتگ پہ خدمت ءَ
میان ءَ بستگ پہ زبان ءَ اچ پدا دُردانگ ءَ
ماہ پہ ماہ کشیت کتابے نام ’’بلوچی ‘‘ ایر کتگ
مچ کنت راج ءِ زبان ءَ دیم دنت چاپ خانگ ءَ
گوشتناں کل شاعرانی کاریت یکجا کنت اوار
کل ادیبانی تواران کنت چو سہر ءِ چانگ ءَ
بستگ اَت مردی میانے ڈیہہ ءُ راج ءِ خدمت ءَ
کار کنت باز پہ زبان ءَ پرکنت جرمانگ ءَ
کمی آں پورہ کن اِت نوں گوستگیں پدمنتگیں
بیابہ بر دیم ءَ زبان ءَ بِل اِت نوں مامانگ ءَ
یک مکانے دفترے لوٹیت بلوچ ءِ نندگ ءَ
نوں بلوچان ءَ بہ بیت آواز وتی پہ زانگ ءَ
ملک ءِ سردار ءُ امیراں تاکدیں واب ات شما
چست کنت راج ءِ زبان ءَ چارات را ج ءِ شانگ ءَ
بس کن او آدمؔ گشت اِنت تو حقانیؔ حبر
اے خبر تئی کاربنداں کیت بلوچی وانگ ءَ