شمشکار نہ باں

من وتی جاه ءُ دَیاراں چہ شمشکار نہ باں

همسر ءُ سنگت ءُ یاراں چہ شمشکار نہ باں

ماں پٹ ءُ کوهسراں هَور شَلان اَنت ءُ گْوزاَنت

سبزگ ءُ تَلّی بهاراں چہ شمشکار نہ باں

مهتل اَنت پہ بُنی گْرندے ءُ گروکی شهمے

پِیلّی جوش گپتگیں هاراں چہ شمشکار نہ باں

آپی مَلّ اَنت گوں گْواتانی سُبکیّں کولاں

کُهکَشی سبزیں کشاراں چہ شمشکار نہ باں

هون ءَ چوتُژنگیں مردئیگ ءَ اول تنگ کن اَنت

دلجمیں سبزیں سگاراں چہ شمشکار نہ باں

کوہ ءُ ڈاکانی تہ ءَ تْرپّ ءُ گِتانانی سر ءَ

گْوستگیں جَنگی ھَساراں چہ شمشکار نہ باں

سبز ءُ اُمبوھیں کھیرانی من ءَ جُست کن ئے

گْریشگ ءِ ڈنگر ءُ داراں چہ شمشکار نہ باں

گُڈ شَپی رَھجتیں مردانی گوں وابیں چمّاں

مِنزل ءَ بوتکگیں باراں چہ شمشکار نہ باں

مُرگ پہ بال مِر اَنت نُکّ چو کَلَنڈ ءَ تَرّ اَنت

آ پٹ ءُ کوھی لواراں چہ شمشکار نہ باں

ماں بُن ءَ اِش آپی زِھے نرم چُکُرّان ءَ رِچ اِیت

مَرد وریں تْرشت ءُ تلاراں چہ شمشکار نہ باں

پہ وت اِش شات کن اَنت بے کس ءُ بْراتیں ھونیگ

رستری بیمّ دھیں گاراں چہ شمشکار نہ باں

واب ھیالے ءُ پہ کَلَھے من ءَ یات اَنت اَنگت

لیب جاھانی زباراں چہ شمشکار نہ باں

آ کسانی ءِ تسلاّدِہ ءُ سَھڑینوکیں

دوستیگیں دست سماراں چہ شمشکار نہ باں

دامن اِش تو گْوش ئے پُر لجّیں مچاچ اَنت گْرانیں

سْیاہ ءُ متراسی ءُ شاراں چہ شمُشکار نہ باں

یات کاینت من ءَ کاشانی ءُ شِمشکُ اَنگت

مشکتی ریسک ءُ کِناراں چہ شمُشکار نہ باں

تو من ءَ تْرانگ ءَ پِرّین ئے گلگدار بَیَنت

من وت آ باگی اناراں چہ شمشکار نہ باں

مار اِتگ تانجو من بے گنجیں زھیریگانی

کہ وتی جاہ ءُ دیاراں چہ شمشکار نہ باں