زند ءِ بے مُزدیں ودارانی روا دار بہ بیت
آپ سمّاک ءَ جتگ، انسٹیٹیوٹ آف بلوچیا، 2019
شِنگ کن:
زند ءِ بے مُزدیں ودارانی روا دار بہ بیت
کئے نہ لوٹیت کہ وتی جند ءِ تہا گار بہ بیت
من گوں زِرد ءِ وتی اندوہ ءُ غماں شاداناں
کئے پہ چار روچ ءِ گل ءَ دگرے ءِ چمّدار بہ بیت
کئے پرے سال پرا سال وتا کریاب بہ کنت
من گُشاں روچے دوبر ہور بہ بیت ہار بہ بیت
منی بِستار ہما چوکی ءِ دار ءِ بستار
مناچے سوب رسیت ہشت بہ بیت چار بہ بیت
انشپی ماہ گوں استاراں ہمے داب ءَ اِنت
چو کہ مہگو نگے سور ءَ وتی سینگار بہ بیت
پمن آروچ دو عید اِنت دگے چے گشت کناں
تو کہ بیائے پہ گِراکی دل ءِ بازار بہ بیت
مارا قاضی گوں چشیں زندگی ءَ مطلب نیست
ہو چشیں زند کہ وتی جند ءِ سرا بار بہ بیت