پل رِچنت چہ مہروانیں آزمان ءَ یا نبی
آپ سمّاک ءَ جتگ، انسٹیٹیوٹ آف بلوچیا، 2019
شِنگ کن:
پل رِچنت چہ مہروانیں آزمان ءَ یا نبی
کترہ کترہ نام تئی وِرد اِنت زبان ءَ یا نبی
اے تئی پیغمبری شان اِنت نّبیانی سروک
سد بر ءَ چُکاں ، دل ءَ داراں قرآن ءَ یا نبی
تئی ہمک لبز ءِ بہا چہ آدم ءِ واک ءَ در اِنت
سد درود ءُ سد سلام واجہ تئی شان ءَ یا نبی
پہ ہمک مزن ءُ کسان ءَ پہ ہمک درماندگ ءَ
رحمت ءِ جمبر تئی شنزان اَنت شلان ءَ یا نبی
تو جہانانی ہما برزیں پدانک ءَ رستگ ئے
برز تر اِنت چہ قاضیؔ ءِ فِکر ءُ گمان ءَ یا نبی