قدحاں زندگی شہاراں بات
کلیں چاگرد گوں خماراں بات
وشنیتکانی کُنٹگ اَنت چمّ ءِ
جی منی ڈیہہ ءِ سرمچاراں بات
داں اے بے مدّتیں جہان است اِنت
سرجمیں زند تئی وداراں بات
مئیگ ءُ تئی مہر ءُ واہگ ءِ قصّہ
یادگارے ماں یادگاراں بات
من وتی پیری ءَ دلگوشاں
آ ماں ورنائی ءِ بہاراں بات
کیچ دائم بہ بیت چو گلباگ ءَ
سبز ءُ میتاپ کوہ ءِ ماراں بات
دل منی راہ ءِ مستریں آنٹ اِنت
چوک ءُ چار راہ ءِ تیر باراں بات
داں اے امروز ءَ مرد مے است اِنت
قاضیؔ گالاں وتی کتاراں بات