عید محمد عید

بلوچی زبان ءِنامداریں شاعر عید محمد عید1952ءَ بل نگورءَ میاہ عاشق علی ءِگس ءَ ودی بوتگ ۔ آ وھد ءَ بل نگور ءُ نزیک ءُ گوراں وانگ ءُ زانگ ءِآسراتی نہ بوؤگ ءِسبب ءَ آئی ءَ وتی وانگ ئُ زانگ برجاہ داشت نہ کتگ ۔ عید محمد عید 1979ءَ کار ءُ روزگار ءِشوہاز ءَ مزن ہورءِملک متحدہ ارب امارات ءَ شُتگ ۔ اودا عرب امارات ءِ شیخانی لوگءُ جاہاں کار کنگ ءِوھد ءَ آئی ءَ سما بوت کہ بے وانگ ءُ زانگ ءَ ہچ بوت نہ کنت گُڑا آئی ءَ روچ ءَ کار کتگ ءُ وتی وانندہ ءُ زانتکاریں مردمانی گورا ونتگ ۔ محنتی ءُ جپاکاریں مردمے بوؤگ ءِسبب ءَ آئی ءَ زوت اردو ، بلوچی ءُ انگریزی زبان ءِوانگ ءُ زانگ دربرتگ ۔ 1985 ءِ زمانگ ءَ شاعری بندات کتگ۔ ماہتاک آساپ ، بلوچی ، بلوچی لبزانک ءُ سچکان ءَ آئی ءِ شعر چاپ ءُ شنگ بوتگ انت۔ آئی ءِشعرانی دو دپتر ’’ عشق ءِحدیث ‘‘2002ءَ لیجنڈ پبلیکیشنز ، کراچی ءِنیمگاءُ 2011ءَ آئی ءِشعرانی دومی کتاب ’’ہوشام ءِدرانگاز‘‘ باقی بلوچ لائبریری ، بل نگور مکران ءِنیمگاچاپ ءُ شنگ بوتگ اَنت۔ عید محمد عیدءَ 15جون 2019ءَ دُنیا سفر کتگ۔