بنی آدمَانی جلگہیں دنیا پہ چمے سئیل کنت
عبرت نہ گیپت انگت گشئے آسیں حیال
باپیں بدن کہ سر شپاں روک اِنت چراگءِ نیتءَ
کہ آگہی نیمون پرمَائیت شپانی لذتاں
قرنانی پاسپاناں ہمک پاسءَ منءَ لیلام کتگ
چندے نظر انگت منءَ گوں بستگاں
چندے کسّءَ
نشتگ منی راہءِ سرا لیلو جتگ
نقش انت منی پیشانیءَ
عہدے گوں مَاتوئی چیہانٹ
وائے منی بے تالہی
من چہ در آمد ہر کسءَ
مردم گری ،سیادءُ عزیز ی چہ ازل
بستگ گوں گواتءِ پلوءَ
چو وشبوءَ یل داتگ انت
من چشتگ شیطان ءِ آپ
من کودکیاں زندگیءِ گوانزگءَ
گوں پاکیں دیدوکاں منءَ چمے بچار
من سیاہ شپانی ہلوتاں
روزردءِ زردیں رولہاں
مرچی منی نامءِ سرا
دنیا ہزاراں گپ جنت
توہم منی بربادیءَ گوں بیتگ ئے
رحمانیءَ روچءِ منءَ برہنگ کتگ
مَاں راہسراں
انگت وتءَ نندئے ءُ ساڑائے ستاء