چہ درستاں پیسرءَ سر گپتگاں من
پہ تو چکّ ءُ پداں پَشت کپتگاں من
مہ ٹوھین ات من ءَ منکر نکیراں
کہ دْراجیں مدّتے رَند وپتگاں من
پہ من بیکار اِنت نی درمان ءُ داروگ
نہ باں زندگ کہ سک تھ کپتگاں من
نہ رسَت معنایے تئی نیادانی واب ءَ
اُمیت ءُ اوست ءِ اوتاگ سِستگاں من
گوں ٹالے مھپرانی، وش مھاراں
مناں کہ تیل ءُ سانکل سِستگاں من
بہ گیشّیناں وت ءَ راچون، نزاناں!
بدیں دودانی تنداں بستگاں من
غم ءُ اندوہ ءُ بژن ءُ سوچک ءُ سوزمان
ھمے مَڈی ءُ مال اَنت زُرتگاں من
من بال کت پہ جلشکاں کلکشان ءِ
جَل ءُ جوریں تیاب ءَ کپتگاں من
گوں میشاں بانر، گوں گرکاں بہ اولاس
چُشیں زندءَ ظفرؔ سر گوستگاں من