شَے مُرید ءِ وارتگیں بیا قول ءُ سوگند ءَ بچار
چے گنوکی کنت گنوکیں چاکریں رند ءَ بچار
سسّی ءَ دیم دئے کہ بِلّے کیچ ءَ اِحوالے بہ گیپت
پُنّو ءَ من ہم گُشاں کہ تو برو سندھ ءَ بچار
تئی کہ دِیدوکاں پہ رنگ ءُ ناز ءُ بوہ ءَ کنت زہیر
تو بہ نند آدینک ءِ دیما ءُ وتی جند ءَ بچار
اَنگت ءَ گاراں حیال ءَ دُور بُنیں کورچاتی ءَ
بیا وتی موجیں تب ءِ تیلانک ءُ گوٛرگِند ءَ بچار
مارا چو پجّہ نیارنت زاہری چمّ ءُ نظر
تو منارا چہ دِلانی ساپیں دُورگِند ءَ بچار
بلکیں سہدارے پہ بے حالی دپی جستے بہ کنت
چوں پہ اُمّیت اِنت ممتاز مُرتگیں زند ءَ بچار