دل وتی گیگ ءَ نہ گندیت باطن ءَ
حون رگ ءُ بندانی قید ءِ گردش ءَ پِہری کتگ
اَرس لوٹیت گرٛیوگ ءُ زار ءِ توارانی وتا
بندی مہ کنت
بند ءُ بوگاں وت ماں وت اَلوتے
کرتگ بِنا
واب گندیت کہ درئیت
پہ منزلے
ریشیں جگر
آپ ءُ آبندے وتا را سر بہ کنت
تُنّ ءِ غم اِنت
واب چمّانی تہابے واب، واب ءِ گندگ ءِ
راہ ءَ در اِنت
چم نہ چارنت نیک ءُ بد
تلوسیت کہ پہ وتا
راہے بہ درگیجیت حیال
روچ رُژنے ءِ شُہاز ءَ در پہ در
شپ چہ اِستارانی بِیمّ ءَ
دامن ءَ مُہرڈَکّ دنت
ماہ گاریں ماہکان ءِ رَندپداں
سنگ نمبیں ساہگانی نرمکیں
گاماں بُرنت
ریک جند ءِ ہستی ءِ جُمپانی چیرا
چیر ءُ سر
پُلک وتی دنز ءُ غُبارانی تہاپٹّیت پداں
دل پہ تاہیر ءَ،
پہ تاہیری ءَ دَرکار اِنت
آرامیں دلے
گُلزمین ءَ را جواب گردینتگ
نیل بومیں زِر ءَ
آپ ءِ بارگرٛان اِنت پہ منی
یکیں سر ءَ
آس، آس ءِ دل نہ کشّیت
ماں بہ داریت کِیلّگاں
آپ، آپ ءِ دل نہ لوٹیت
کہ بہ توسیت اَنگراں
گوٛات سرکشّیت ءُ جنت
زہگی دو گوٛانک
آزمان ءَ جمبرانی
گِس دپی ڈَنگر جتگ
گُلزمین لوٹیت مہ زُوریت
ہور ءِ آپ ءِ مِنّت ءَ
مرگ ءَ جارء بادشاہی
بیرکے دست ءَ اِنت گردیت میتگ ءَ
زندگی گرٛیت ءُ شلیت
ہوشینیت اَرس ءِ چَمّگاں