سبزیں آپے
گوں نرم ءُ سُبکیں رَواجاں توار اِنت
“درامد!
درامد بُنءَ آسمانءِداں چُنت عمر ترئے؟
داں چُنت عمر اوشتئے؟
داں چُنت عمر نِندئے؟
داں چُنت عمر بیگانگیں صُورتانی
مُجءُدنزءُدوتاں
چو ھَیرانیں آرٹسٹ چَنڑئے؟
درامد،تئی دستءَ اِے مُندرِیکءِ اوپل چِراگے
درامد تئ گھڑیال کوھن ءُ کدیمیں کتابے ءِ تاکاں بہوکیں اَدارانی گاریں گُلابے
درامد!
گِدان ءِ من در پہ ترا پچ کُتگ بیا
درامد اِے ھونکیں آپءِ تچوکیں بہشتءِ تہا بیا
درامد کُجا سر جنانئے؟
کُجانگو روانئے؟
اِدا بیا!
اِدابیا!”
درامد نزانتیں چیا اِے توار ءِ پدءَ رپتگاں من
چیااتکگاں سبزیں آپءِگِدان ءِ تہا نِشتگاں من
چیا دُور ءُ دراجیں پدانکاں چہ ایر کپتگاں من