درد مَے گندگ نہ بنت ءُ ٹپّ پیشدارگ نہ بنت
مَے وَ ھنچیں کسّہ اَنت گوں ھرکس ءَ آرگ نہ بنت
مارا اے ھال ءَ رسینتہ کَے گوشیت مَے دژمناں
چوں کنیں کہ دیم پہ دیم ءَ دوست ڈوبارگ نہ بنت
مَرچی شَھر ءَ ھال شِنگ اِنت پُر بھا بنت نیادی ءَ
اے وڑیں پہ دُروگیں ھال ءَ لوگ ماندارگ نہ بنت
کس ھلو ھالو نہ روَت ءُ منزلے ءَ سرنہ بیت
راہ ءُ در گوں زگریں ھوناں دانکہ سینگارگ نہ بنت
بچّ نازاکیں شپاد اَنت سردر اَنت ماھیں جنک
ڈیھ ءِ اے رنگیں ندارہ گوں من ءَ چارگ نہ بنت
کپتگ آں ابدال بھشتیں ڈیھ ءِ مرچی ترانگ ءَ
گریوگ ءَ اِنت دل پمیشکا ارس مَے دارگ نہ بنت