گوستگیں سال ءَ پروش وارتگیں لشکر
امبری پدا پہ داوا ءَ ساڑی اِنت
لشکر ءَ ھواریں ھرکس جیڑگ ءَ اِنت
تیر، کاٹار،سگار ءُ اسپر
زندگی کسّی چمّانی تہا سہرا بہ بیت
داں ھما وھدا کہ داوا پدا بندات بیت
تیر وارتگیں سپاہی ئے کپیت
ءُ چمّ ئے گُڈّی رندا کہ شھم اَنت
اودا دو سالی جنکّیں زہگے ءِ اکس پدّر بیت
زندگی اِنّاں
دیگہ یکّے ءِدست ءَ تیر ءِ کمائیت
تہ آئیا ھیال کئیت کہ
جنگ ءَ رند
پہ وتئ چُکّاں گُد زورگی اِنت
ءُ تہت ءِ سستگیں روت نوک کنگی اِنت
زندگی بس زندگی اِنت
نہ گرم نہ سارت
نہ نیزگار نہ مگیم