جمبراں تُن چہ زِر ءَ پروشتگ
سدکاں نوں جہان شودگ بیت
دوزہ ءِ آس سوتک نہ کنت مارا
تربت ءِ تبد سگ اِتگ جان ءَ
تُرس جاتگ زِرءَ چگل داتگ
نوں گریوگ تئی نصیب ءَ اِنت
چولاں پادینک کُرتگ اَنت بیھال
وش نہ اِنت ھچ تیاب ءَ گردگ
تو من ءَ شُشت ءُ تاپ دات روچ ءَ
من پتو بوتگاں مدام ساھگ
زِند پولِنگ کُت ءُ جتا بوت ئے
من نہ شُشت ءُ وت ءَ ترا جیڑ اِت
چو ترا دامن ءَ بہ بنداں وتی ؟
من مسافر من ءَ ٹِکانہ نیست
واجہ ءِ واجہی زِر ءَ زیراپ
مولِد ءِ چُک ءِ نام میر چاکر
وپتگ اَنت یک یک ءَ کُل استال
آگہنت ماہ منی تئی پیم ءَ
آپ زُرتگ جوانی ءَ لعل ءِ
چاڑ بوتگ منی تہ ءِ شیطان