من گوں بے ترْہیں ارواہ ءَ
نشتاں ایوک ءُ تہنا ءَ
ارساں گوہر ءُ یاکوتیں
پیچاں ماں سریگ ءَ دوچیں
کُوراں چہ زھیراں گیشیں
لیئکو آں جناں دل سوچیں
وھد ءَ پہ روْگ اشتاپ انت
زیکیں پاسے ات پیژگاہ ءِ
امبوئیں چنال آباد ات
آتارات سباہ ساچانیں
پُل گوں پاتو ءَ ہم نیاد ات
ارسیں دیدگاں بچکنداں
مولم رُستگیں پاسانی
ناکامیں دلے مجبوریں
گشتے کہ رواں در ملکے
درملک ءُ دیْارے دوریں
چیزے مدت ءُ ماہ ءَ پد
واتر باں پدا پیژگاہ ءَ
وابانی گُلیں درگاہ ءَ
گوستاں مدت ءُ سال ءُ سن
بے چاڑیں دل ءَ جیڑاں من
سے سال ءُ دو ماہ پر گوستہ
ہوشام ءَ جتہ ارواہ ہوں
دل چو درچکے ءَ گیمرتہ
دوروں پہ دوبار ءَ نیتکاں
بے چاڑاں من ءُ دل تاباں
شپ نمبیں نگاہ بے واباں
ماہ ءِ بانکءَ رمبینیت انت
دوست ءُ دزگُہاریں استال
بانوریں شپ ءِ رخساراں
سُرمگ رتکگ انت یاتانی
دوشی داں شپے سے پاس ءَ
نشتہ گوں وت ءَ آؤرتہ
کسہ گوستگیں نیادانی
دروگیں وادہ ءُ اکراراں
کُوریں دیدگوں رہچاراں
آسے باتن ءَ مان اتکہ
کشاں اشکریں اُپاراں
نالے ریدگیں پیشانی
مورت ءُ روگناں مینیتہ
پال ءُ ماسگوں گْوندینتہ
آزاریں ہمک ارمانوں
رہنیں چیکویئے چنڈینتہ
بے سبریں دل ءِ اوپاروں
دروگیں دراہییئے ریپینتہ
ویرانیں لد ءُ گیابانے
دیگر تالہیں مرگاں گوں
لیئکو اوں جتہ(ءُ) گْریتہ