میتگ

میتگ ءِ مرچاں نِدارگ پیسری ڈول ءَ نہ اِنت

ھاموشی اِنت

بے برمشی اِنت

ویرانی اِنت

بس گوات ءُ بُچّاں لیٹ دَنت

پُرشتگیں دیوال ارسانی آدینک اَنت گش ئے

کپتگیں لوگانی پُشت ءَ واب آگاہ اَنت مدام

ڈُرتگیں بانانی کُنٹاں کِسّھے جیگ ءَ جَتہ

واھگانی کُل ءُ کَرگین پُرشتگ اَنت

کاپَر ءُ ھَرپُشت ءُٹُپّو پھک گوات ءَ بُرتگ اَنت

دَلوَتی واڑانی کَرزبند سِستگ اَنت

گِز دپی ءُ مُھکمیں پَلّانی تیھُور سِستگ اَنت

کاپرانی دیم ءِ لُونجانیں تَپر زَنگ کپتگ اَنت

زِہ دپیں داسانی دَستگ نوں رمیزاں گپتگ اَنت

اَنچیں ویران ءُ ابیتکیں میتگے

ناں کہ توارے دَلوتی گوشاں کپیت

ناں شِنکی پینگگے اَست ناں بُزانی دودَگے

ناں کوانٹے کُوار جَنت ءُ ناں کہ درپیت لیڈھے

ڈاچی یے دَنزیت اِدا ءُ ناں کہ سَرّیتیں ھَرے

ناں سَگی ھولاسگے اَست نیم شپاں

ناں کروسے بانگ دَنتیں بامگواھاں

ناں کہ گُوکانی توارے سَر شپاں گوشاں کپیت

ناں کہ شِکّیت گوانزگے ماں میتگ ءَ

ناں مادری لیلو ءُ نازینکے دلاں تاھیر دنت

ناں چِراگی رُژن تالان اِنت اِدا

ناں کہ کاڑانی توار ءُ کندگ ءُ گُد دوچی یے

ناں کماشی کُلّگے تُرس ءَ بِہ بارت

ناں کہ مھکانیں شپ ءَ اَست گوازی یے

ناں کَپگی ءُ جیتُوے ، ناں وَروکی ءُ گیسی یے

ناں کہ ٹَپا پاپَلی ءُ ناں کہ سِنگاں داسُوکی

ھَو میتگ ءِ مرچاں نِدارگ پیسری ڈول ءَ نہ اِنت

ھاموشی اِنت

بے برمشی اِنت

ویرانی اِنت

بس گوات شیزاریت ءُ بُچّاں لیٹ دَنت

میتگ ءِ مھرانی چات بار گپتگ اَنت

گَلگلانی پَرّگ اِش کُوھَن ءُ تل اَنت

ڈول ءُ شیماز کپتگ اَنت یک کِری ءَ

واھگ ءُ مھر ءِ تَرون بار گپتگ اَنت

ناپَچ ءُ شیکن ماں ھاکاں کپتگ اَنت

ناں تگرد گواپی ماں بیگاھاں زَریت

ناکہ پیریں بَلّی یے پیش تُک کنت

نے کماشے اَست جَلَک داب دَنت

نے ھیاتانے بِہ رِیسیت چیلکے

نے کہ مھتاپے تگرداں گواپ بِہ کنت

نیکہ گُوھرامے بُہ دُوچیت پات ءُ سُند

نے مَھگُلے پہ ما بہ بندیت ماسَگے

ناں کہ دانچوپی توارے چِست بیت

نے جنترے تَرّیت نے کہ گَلگَلے

نیکہ تیچّانی توار دان چَنڈی یے ءِ

ناں کہ جُوّاں چُوری یے ءِ گُد شودی یے

نیکہ شوناں آپ مَنتگ بے بلا

ناں ھَشر اَست نیکہ اَست ھمکاری یے

ناں کہ کَنّاتے بُروت کھناں بِہ جنت

کَھن ءُ کلمیر مرچاں پھک بار گپتگ اَنت

آپ ایمان اِنت بِلے نیست میتگ ءَ

نیست ساربانے ماں کوھاں زھیرگے الھان بِکنت

ناں کہ سوت ءُ ناں کہ وشیں زیمرے

ناں سُروز ءُ ناں کہ ڈُھل ءُ ڈُ کُّرے

ناں نَلے ، ناں کُنزگے ناں توار تَمبورگ ءِ

ناں سبزلے الھان کنت ءُ ناں کمالان ءِ توار

ھَو میتگ ءِ مرچاں نِدارگ پیسری ڈول ءَ نہ اِنت

ھاموشی اِنت

بے برمشی اِنت

ویرانی اِنت

بس گوات شیزاریت ءُ بُچّاں لیٹ دَنت

مچکدگ ویران بوتگ اِمبری

نیست دھکانی توار ءُ سُھبتے

نیست گوَرشان تور ءُ اُووَند ءِ توار

نیست شَگنز ءُ نیست ناہ ءُ شیرگے

ناں کہ پیش بَند ناں کہ پُرّیں پاچِکے

ناں کہ گَرکو ناں مُزاتی ھارگے

ناں ھَلینی کَپُّوے ءُ ناں کہ چانگال ءُ مَدَر

ناں بِٹ ءُ تَلکے کہ کانگاشکے بگیپت

ناں شکاری یے گوں دام ءُ زَرد چَکیں گوارچ ءَ وتی

تَل ءُ گواشاں سیسی ءُ گوَرداگ گیپت

ناں کلبجے چیر کنت ءُ ناں کہ بندیتیں شَشیم

ناں کہ مھرانی اَموچکاں دور دنت

نیست شپانکے بُزگل ءَ کوھاں بِہ بارت

ءُ مغرب ءَ پہ شادھی واتر بکنت

براتُوکے نیست کہ شِنکاں تَند بکنت

ناں گوھارے کہ بُہ دوشیت بُزگل ءَ

ناں کہ آریپے پَساں واڑ ءَ بکنت

نیست ماتے کہ بِہ مَنتیت ھیزک ءَ

ھَو میتگ ءِ مرچاں نِدارگ پیسری ڈول ءَ نہ اِنت

ھاموشی اِنت

بے برمشی اِنت

ویرانی اِنت

بس گوات شیزاریت ءُ بُچّاں لیٹ دَنت

مرچاں پنچ وھد ءَ نہ بیت بانگ میتگ ءَ

مئے مسیت ءَ نیست ملّا چاکرے

مئے مسیت ءِ پاکیں دَر دُرست پُرشتگ اَنت

نیست کماشے بئیت نماز ءِ وانگ ءَ

نے ھیاتان ، نے جلائی، نیکہ اَستیں رھمتے

نیکہ موسی بیلُکے ءُ نیکہ اَست نور محمدے

نیست زھگے بئیت قرآن ءِ وانگ ءَ

نیست زگر ءُ نیست عبادت میتگ ءَ

نیست واز ءُ نیکہ پَنت ءُ نصیتے

میتگ ءِ اسکول ءِ دیوال پُرشتگ اَنت

ٹاٹ ءُ کرشی پھک رَمیزاں گپتگ اَنت

نیست زَھگے بئیت سُھباں وانگ ءَ

میتگ ءِ دوکان بند اَنت دائمی

مرچاں ھوٹل میتگ ءِ بَدجلوہ اَنت

نیست دیوان ءُ مراگاہ مجلسے

ناں مسکرا ءُ کندگ ءُ وش گپّی یے

ناں کہ شیر ءُ شربت ءُ چاہ واری یے

ناں کہ لئیب ءُ گوازی یے اَست ھوٹلاں

ناں ھَشتی ناں مَجُولی ناں کہ اَست نُھ گَڈگی

ھَو میتگ ءِ دروشُم فضل مئے مَٹ اِتگ

میتگ ءِ مرچاں نِدارگ پیسری ڈول ءَ نہ اِنت

ھاموشی اِنت

بے برمشی اِنت

ویرانی اِنت

بس گوات شیزاریت ءُ بُچّاں لیٹ دَنت