موجریں دردے ءِ تماھاں من
شینکی راڑے وت ءَ پتاھاں من
نوبت ءَ ھورکیں کاسگے گون اِنت
بیا کہ ھئیرات بووگاھاں من
تو گوں کندیلیں لنککاں گْوپت اَنت
ہنچیں وابانی پیژگاھاں من
کُلّیں ارواہ منی تھا وپس اَنت
چہ ھمک کبر ءَ پادکاھاں من
آس ءُ کُنٹگ منی کِشک ءُ ہنکین
اھد ءِ سرجم تریں گُناھاں من
اے منی دوست ءِ مھربانی اِنت
دشمنے ءَ گوں آشناھاں من
چو مچار ءُ منارا پاشک مکن
اچ وت ءَ چیر بووگاھاں من
زھم ہر شپ منا واب ءَ گند اَنت
ہنچیں وھدے ءِ جنگجاھاں من