شپ ءِ کدوءَ اَلوتانی مُرگ جیڑگا اِتنت
اے بے زْوانین ایکوی
نہ زاناں باریں پر چیا نہ گالتہ
ہما نہ گُشتگیں ہبر
دل ءَ گوں جند ءِ دْریکّگاں نہ کرتگ اَنت
ناں آپتاکے ءِ سرا پہ اِہوتی نبشتگ اَنت
نواں حُدا سہی بہ بیت
بہ جسکیت سنگ سیاہیں آزماں
پہ ہون اِیسپیں ہنّیانی
رولہیں بشارتاں
گُبار اِیسکیں شورہی
نپس نہ پُرّیں ساہتاں
اَڑان اِتنت دگّ، دَمب منزلیں مسافتاں
من باریں چنت اَرس کلّریں نگاہاں
آگہی ءِ واب کِشتگ اَنت
اَنگتہ نہ رُستگ اَنت
تنی ہمودا وہد اَنگہ یک پادءَ جَکّتہ
یک رِزّہے نہ کنز اِتہ
من ءُ مرید ءُ توکلی
وتا چہ دُور سَے پہ سَے
پہ بے مرادیں ہانیاں
زمانگ ءِ دل ءِ تہا
پہ اُپّ وت ملامتی ءِ داگواں
دمینگا اِتیں
شپانک ٹَوکیں سمواں گوں
بنگ مینگا اِتیں
نواں حُدا سہی بہ بیت
بہ جسکیت سنگ سیاہیں آزماں