پل ءَ چو من کمات ءَ وت ءَ ہار ءَ بستگ آں
بیا تئ وپا ءِ دامن ءِ من تار ءَ بستگ آں
ملگوراں چو مہ چنڈ ھیال ءَ وتی بدار
زلپ ءِ ہمک من ٹال ءَ تئ ماہپارہ بستگ آں
پیشگاہ ءَ تئ من ہر شپ ءَ کچکے چو وڑا
پاسپانی من مدام گوں گم ءِ دار ءَ بستگ آں
انگت ہما تئ داتگیں نازل کہ تو مناں
گوں کول ءُ تئ بیا وادہ ءُ اکرار ءَ بستگ آں
چوں آجو من کناں وت ءَ زندان ءَ چہ گم ءِ
زہیرانی سانکلاں گوں تئ بے وار ءَ بستگ آں
گنجیں جلال پہ مناں دانکہ من زندگ آں
اشک ءَ جنکے ءِ من گم ءِ شار ءَ بستگ آں