سمین ءَ گورتہ سوری ءَ دوئیناں

سمین ءَ گورتہ سوری ءَ دوئیناں

بہریں پوٹواں گور پہ گوریناں

صباح ءَ بانگہی من پاد کایاں

جنے کیت اچ من ءُ دیما ردان ءَ

دوئیں سرکوپگاں چاپاں جنان ءَ

ترھوکیں مادھنی کنڈان دیان ءَ

دوئیں چم قدحیں آسی بلان ءَ

سر ءَ پونزے گشے تیگے بھوکیں

بسٹ اچ عاشق ءِ جان ءِ گوزکیں

من لوہارہ(۱) بان (۲)وڈو دیوکیں

’’مکن گد شود ہمے ڈوراں تلیناں

سوہاگ مئے بیگہہ ءَ وت آپ کانیت‘‘

من ءَ ڈوہ نیستیں او بانک جنانی

من ءَ بہانے تئی جان ءِ گدانی

ترائیں پٹ کن آبریشمانی

بہشت ءَ بات تئی مات مکہانی

ترا پیدا کتہ بانک جنانی

بیا او پیر ولی لوڑی مجانی

بیا او زیر منی شئیر ءِ رلی ءَ

بگُش اود ءَ کہ گراناز اش نگوشی

دنیائی رپتگنت کوڑگ دو روچی

نواں مں کوڑو ءَ مارا شموشی

منی دل جوڑتہ ڈیل ءَ تئی ءَ

بئیے تو آسکلو پٹ ءَ چروکیں

من اِت تو پچی باں پہنات ءَ گروکیں

بیئے تو بارگیں تازی تچوکیں

من آزوار باں چابک جنوکیں

بئے پلے من پٹ ءَ ردوکیں

منان بینگ مہسک دم دم کنوکیں

ہمو پُل ءِ دپ ءَ واس ءَ گروکیں

____________________

۱۔ آھنکار۔ اُستا ۔۲۔تیز کنوک۔