انگہ پُلاں جان نہ شُشتگ نوداں شنزگ دمبرتگ

انگہ پُلاں جان نہ شُشتگ نوداں شنزگ دمبرتگ

گْوات سباءِ سرگپتگ نُوں ماہءَ جُنزگ دمبرتگ

مرچاں زندءِ وشیں گْواتءَ زاناں کشّگ سِیر کتگ

مرچاں دْرینءَ تئی گیوارءِ رنگءِ دُزّگ دمبرتگ

لہتیں روچیں شیئر نہ گُشتگ، مَرگءِ قہریں امبازءَ

لہتیں روچیں زردءَ جیڑگ، چمّاں گْریوگ دمبرتگ

سہتے دیمءَ وہد نہ ٹکّیت، گامے پشتءَ اوست نہ رؤت

مرچی انچو بیت شُبینگ روچءَ کنزگ دمبرتگ

عمرے گْوستگ بے ہوریءَ، عمرے گوستگ ڈکالءَ

زندءِ نیکیں پال نہ اتکنت، مَرگءِ مازگ دمبرتگ

آپءَ راہ ءُ رند شمشتگ، جِنگاں ساہگ مٹاتگ

عادلؔ زندءِ ہشکیں دْرچکءَ زاناں سبزگ دمبرتگ