آشکے کنت مست ءُ سمو، شیھ ءُ ہانی کِسواں
مالدارے یا شفانک، میش ءُ بُزانی کِسواں
گِریَّغیں ہرکس گوں زندئے، کُوڑَوئے تَھلیں غماں
تئی دف ءَ یا مئی دف ءَ ، رنج ءُ غمانی کِسواں
ھر گوئرے ءَ ھون بو ایں، بِیتہ ڈیھ وَیران منی
چون، کناں مں، مجلسانی، کندغانی کِسواں
رنج ءُ مونجانی او سنگت، شہ مناں پول ءَ مخن
اَش بِکں شعراں منی، اے اندوہانی کِسواں
او منی ڈیھ ئے شھنشاہ اَش کلاتاں دربیا
ساھتے اَش کں ، گریب ءُ گُژنغانی کِسواں
سوھواں کہ نیم راہاں ایوک ءَ اِشتہ ھبیب
شہ کئیا پول ءَ کنت، دیمی مَنزِلانی کِسواں