آتکگْ اَنت کنداناں گروخ دوشی
کیھوی ءَ ژہ جُلگم ءَ پارا
ھال دوستانی داثگْ اَنت مارا
ماگُلی گِنّاشتاں او جان ءَ
رُست ءَ یک درین ئے ڈکِنڑ ئے پارا
پہ گُرا استین یے اَجب رنگیں
درست منی دوست ءِ مھذوے گوناں
مں گنوخاں کہِ گوں دل ءَ جیڑاں
دل گنوخے کہِ گوں من ءَ جیڑی
گریه ءَ کنت تنگو دروشمیں بچی
زورھ کنت شاھ ءُ زالمی ترکی
مں مژاں زنزیر ءُ مَھفرے لوٹی
اژ ھماھاں کہ مں سذاں یک ئے
مول ئے ماں گوھاراں دِھ سذؤ لکھ ئے
ما دل ءِ ھال پہ مرکب ءَ داثہ
ڈاہ بڑتہ بِری ءَ رَوخین ءَ
ژِل ءَ کنت مَوری زامریں دُمب ءَ
جنت اوو سرزاناں ملوکیناں
او منی واژہ بنگ ءُ مسکانی
مں تئی پاگْا مسک ھُراسانی
قادرھ سوب ءَ را نگْہ دار بئے
مں ترا بیگاھی براں اوذ ءَ
اوذا مں میری دیرھ ءِ دیم ءَ
اوذ ءَ کہ آھو دروشم ئے مانیں
آں سرو کدین گور گُھر گریہ ءَ ایں
لال ءُ ھیرا او آسمی بوئیں
ٹِلّی مں مَسنداں ھریویگْاں
عرز کن وا ازھار کن سری گالاں
اژ وثی مھتاجیں دل ءِ ھالاں
نندؤ ثی اندوھاں کن ئے تالاں
واس چمبیل ئے گل سترمارا
وث سئی اے ژہ اِشک ءَ اسرارا
دوست اغ ءَ درمانے بہ دا مارا
دُر ھدیث بیا کہ وش ھدیث بیوں
اندوھاں لئلیگْاں بہ گال ءَ اوں
دژمناں ھاخ ماں دیذگْاں ساوں