مئے ساہ اِنت بلوچستان، مئے جان اِنت بلوچستان
مئے زندءِ ھمک دردءِ، درمان اِنت بلوچستان
سر سبزیں چو شاداب اَنت، دنیاءِ دگہ کھچر
اَپسوز کہ مدام سُھریں ھونان اِنت بلوچستان
پرچا من نہ باں بندیگ، پرچا من نہ باں کولیگ
کہ زِھریں تیرانی، دیمپان اِنت بلوچستان
پل کُرتگ ھزار رندءُ دنگاں چہ ھمے زیداں
انگت ھم دگہ ڈنّی دستاں اِنت بلوچستان
میراس نہ انت میرءُ سردارءُ نوابانی!
جھگیر پہ وتی سولیں بچّان اِنت بلوچستان
دل بیت اِنت چتور رازی ملّا چہ تئی وازاں
وھدئے کہ منی دینءُ ایمان اِنت بلوچستان