من دِل شُشتگ چو کہ سوابانی پیمءَ
دلءَ من نیاراں حسابانی پیمءَ
دِلءَ چست بنت آنچیں پاھار گرمیں!
پُتریشگ چو آسءِ زرابانی پیمءَ
ھیالانی پراھیں زرءَ من تچاناں
بِزاں چو رؤکیں گُرابانی پیمءَ
چہ زھرءَ جُشنت گوادرءِ ھر دوئیں زِر
کہ نادان نزاننت تیابانی پیمءَ
اے وش کوشءُ وژ گوات منی جیونیءِ
ترا کنت بےسار شرابانی پیمءَ
بہ بیت تیابی ماھیگ گوں ناہ تمپءُ مندءِ
بزاں اَنچو وش اِنت کبابانی پیمءَ
گُلیں کیچءِ زھروکءُ پنجگورءِ مورچنگ
چو ھم سازاَنت چنگءُ ربابانی پیمءَ
جہانءِ ھم پُلّءُ گلاب سکّ شّراَنت
بلے نیکہ شالءِ گلابانی پیمءَ
ھزار رندءَ بولانءِ ھارءَ منءَ بُرت
من انگت ھماھاں گیابانی پیمءَ
مجیدءُ اسدءُ عُمر جانءِ قصّہ
جہانءَ چو نقش اَنت کتابانی پیمءَ
تئی کارءُ کردار کہ مُلّا گری اِنت
وتءَ لیکئے پرچہ نوبانی پیمءَ