بیکاں گوں بندگ ءَ اِنت دیوال آسمان ءَ
دانکہ مہ روت عزابی ءِ مئے حال آسمان ءَ
تئی دروشم ءِ ستا ءَ تئی مہر ءُ تئی رضا ءَ
نازل چو آیت ءَ بنت ہر گال آسمان ءَ
محتاجی چے رنگیں مئے ہمبلاناں زُرتہ
دست ٹال واجہ ءَ پہ چم ٹال آسمان ءَ
یک یک ءَ دیر بیان انت مئے بیل پُر مڑائیں
ہر شپ سِدیت چے پیما استال آسمان ءَ
وہدے پہ وا ءُ پریات وہدے پہ دعا ءُ سلوات
گوں من نہ بیت کناں من جنجال آسمان ءَ
ہردین ءَ چاردہی ماہ چو مہگل درٛشپیت
دل کشّیت کہ کناں بے چہ نال آسمان ءَ