اے دُنیا دڑد بازاریں
کہ ھرکس شہ وت ءَ زَھریں
وتی ھیداں گِرِفتاریں
عجب دنیا ایں اے دُنیا
او کسسے بے سر ءُ سامان
کسسے رنج ءُ غماں دیمپان
کسسے سار ءُ کسسے بےجان
عجب دنیا ایں، اے دُنیا
او کسسے شوکت ءُ شان ءَ
او کسسے کئید ءُ زندان ءَ
شہ بیزاریں وتی جان ءَ
عجب دنیا ایں اے دنیا
او بازیں سنگتاں کَڑداں
گوں بازیں تنگی یے دڑداں
کہ باز بے لیکَویں وڑداں
عجب دنیا ایں اے دنیا
او چی اے سست ءُ بے کسَاں
او چی اے زور ءُ گوں وساں
کہ زور ءَ ھرکس ءَ ڈساں
عجب دنیا ایں اے دنیا
او کسسے مست ءُ دَیوانغ
گنوخ ابدال ءُ مئولانغ
کسسے شَر رَنگ ءُ دُردانغ
عجب دنیا ایں اے دنیا
او کسسے اُلکہاں دِیریں
کسسے سڑدار، مزن، مِیریں
او کسسے زَھر ءُ دِلگِیریں
عجب دنیا ایں اے دُنیا
او کسسے دولت ءَ باریں
او کسسے نیست ءُ نیزگاریں
او کسسے زمب ءِ چمداریں
عجب دنیا ایں، اے دنیا
ھُدا جی با تئی بَھرَ ءَ
کسسے گَٹ اِنت پہ سِینگار ءَ
کسسے بے پُچ بدن سَھرَ ءَ
عجب دنیا ایں، اے دُنیا