ھمائیں عشق ءِ سر گار انت منی دیریں
تلب کشتگ انت ءُ رودینتگ دل
ایر کتگ زندگی تئی سیپارھیں لنککانی سرا
ھزاراں نیمونءَ گورجتگ باتنءَ
چنچو تاچینتگ وتءَعشق ءِ بے نپیں راھاں
پیر ءُ ملا فقیر ءُ ولی
سبز ءُ سیاھ چکیں بندیکانی من واھند
کوھن ءُ تند بستگیں دریگانی سرا
واھشانی بستگ ات باندات
بلکینءَ امروز بہ بیت وش رنگ
واب دیستگ ایں من چم وتی ششت آں
گوں زم زمے آپءَ
دل پاک کتگ چہ ھمک کردءَ
شپانی ورد ءُ سُہبانی خیراتءَ
دمبرگ نزانتگ من
برے یک ھاجتےءَ زند گوازینتگ
تئی ھاجت منی مھرانی بنزاہ ات
ھمے مئے شوکیں دنیا ات
تئی عشقءَ ُکدینتگ انَدْر پکہ
ہمک زکر ءُ نمازانی تھا من یاد ترا کرتگ
چو کلمہ ءَ منارا ورد تئی صورت دل ءَ بوتگ
بابا والایت شاھءِ درگاھَ ءَ
وتی من واب کت انت ھیرات
شاہ عبداللہ غازی ءَ وتی باندات ءِ سدقہ دات
درائیں تائید سوتک آں من
راہ داتاں من آپے ءَ
تئی نامءَ
چورہ کت انت ساکم
پہ تئی لوٹ ءَ
جنوزام کندگءَ دیست آں
من سک کند ات
گل ءَ بال بوت منی باتن
ھمے عشق ءِ سرون ءَ دیراں من گریتگ
وتارا من کتگ لاچار
ھاشم شاھ
عثمان مروندی ءِ سہون
گوں بُلھے شاہ دوچار کپت آں
اے سندھ ءِ صوپی ایں مردم منی ھمرائی ءَ گریواں
تئی عشق ءَ
گدارے ءیات منا بیت انت
کہ نانی منَدْرءَ من گار وتی آ منَدْریک اوں کت
ھمائیں عشق ءِ سر گار انت منی دیریں