ہنچو بے بْرمش ءُ چڈّکا رپت کنت
من نزانت آ چو نگاہاں کپت کنت
ہونءِ بوءَ کنت ہمک لبزءِ بدن
کینگءِ زہری کہ شیئراں زپت کنت
چو منیگءَ کئے بہ نازینیت ترا
چو منا تئی مہپراں کئے گْوپت کنت
تو کہ کائے دل چو برپءَ سرد بیت
تو میائے دل چو تینءَ تپت کنت
جلگہیں شہرءَ اوں تہنائی رسیت
کوہءُ گیابانءَ اوں پُلے سْرپت کنت
تو کجام نیمءَ نگاہاں اندرئے
دل کجام دستءَ بلیٹیت وپت کنت
بے ریائیں وہدءِ عادلؔ سینگءَ
تئی وڑیں شائر کجا پشکپت کنت