مئیگو تئی دوری ءَ
مئے گو تئی زاری ءَ
چاراں کئے باج بارت
چاراں کئے گیش کنت
چاراں کئے دور دنتیں سلاھ آں وتی
عاشقے شاعرے یار دیوانگے
اُف کمیں نہ کنت
توکءَ گِلہءُ زنگانی لوگ ءِ تہا
نندیت بس ایوک ءَ
تہنا ھاموش بیت
تئی گوں عکس ءَ وتا انچو مشکول کنت
ھچ نہ بوتگ گش ئے
دل نہ پرشتگ گش ئے
اھو اڈے زندگی چنچو پروش ءِ منا
لبزے لنٹآں نیاراں من گنگے بیاں
ہردیں گنداں ترا انچو زاھر کناں ھچ نہ بوتگ گش ئے
دل نہ پرشتگ گش ئے
من نہ زاناں ترا
تو نہ زان ئے منا
یکے پہ دومی ءَ من درآمد بئیں
نام ءُ ڈس ءُ نشاناں تئی من بے ھال کناں
پہ ردی ھوش ءُ بے ھوشی ءَ لوگ ءِ راھ آں کدی من نیاآں تئی
من وتی ایوکی ءَ را بانور کناں
ننداں ہنی جناں دست ءُ پاداں وتی
وت وتارا من پتو کہ بانور کناں
لکھاں دیوار ءِ دیما
سور مبارک ترا
سور مبارک منی کہریں تہنائی ءَ
اھو جدائی منارا تئی دوست بیت
من ھمے ساعت ءَ ایوکی ءَ وتی وھدیں بانور کناں
لوگ ءِ لیٹ ءَ کش آں
شاکر شاد ءِ درہیں نظم ءُ شئراں
تئی من پہ سانگ ءَ دیاں
من منیر مومن ءِ چیزے دستونک ءُ لچہ
سرجاہ آنی سرا ٹِک ءُ بجالار کناں
بسمل ءِ آپ رنگ ءَ رجین ءَ دوبر
بھنگ مچ بیت ءُ سور ءَ ملنگ مچ بیت
ارشاد ءَ پرواز ءُ عارف عز یز پاگ ءَ بنداں منی
تامرے جوڑ بیت
سرفراز یں شرابی چہ کیت گْوادر ءَ
اللہ بکش بزگیں
عومر کِیّا رسیت
اے آر داد پش کپیت سر گریت سر نہ بیت
گْوں اسحاق ءَ مئے خاموشی آسر نہ بیت
قاضی وانیت نکاح ءَ گنوکیں دل ءِ
اے منی مردم آں
اے منی سنگتاں
تئی پہ دیم گندی ءَ من کتابے دیاں
زند ءَ تیلانک دیاں
عمر ءَ تیلانک دیاں
یک برے اوں نیاراں تئی کسہآں
گوں من گون بوتگے
روچ ءُ شپ ہر کجا
زان پہ زان بوتگے
بوسگانی نشان انگہ ھیر انت تئی
کسے سرپد نہ بیت
انچو ہاموش باں
جند ءَ دلگوش باں
چاراں من چون باں
چاراں تو چون بئے
گوں من اوپار بیت یا نہ بیت زندگی