مئے ڈیھ با سلامت مئے کوہ ءِ سلیمان
ایدا ھئور گواراں ، سُہیل ءُ زمستان
ایدا نود کایاں، چو بنداں کَتار
با سبز ءُ چَراغ ، با کِشت ءُ کشار
تئی دراژ ولیں کئور ، تئی پُلکیں ڈغار
ھُدا ءَ شہ سوال ایں بئے باغ ءُ بہار
آسک ءُ سروان ءُ ، گُرک ءُ مزار
سُھب ءَ کفوتانی وش ایں توار
بُلبل ءُ گُوگو بنداں زیمِراں
ایدا کرگُشک تَراں ماں گَٹیں گراں
جی بات پہ سبزیں تئی کہچراں
پہ سئیل ءُ سواد ءَ مں تئی سمبر آں
کے وشیں رغام ، جُڑ ءُ جمبر آں
اید ءَ ھئور شَنزاں، وشیں جینہر آں
مناں دوست ایں مئی ڈیھ، منی گُلزمین
کہ سرگوات کَشّی یا کَشّی سمین
سلیمان منی سُمل ءُ ماہ جبین
مئی ایمان ءُ دنیا ءُ مھزب ءُ دِین
تئی درشک کلیر ءُ کہیر ءُ گز آں
تئی جئور دے پرمں چو وشیں رَز آں
مں ندر باتاں پہ تئی زَھم جناں
شف ءُ روشی بالاچ ءِ سِپت ءَ کناں
مُدام گیر اِنت چاکر ءُ گہرام ءِ نام
دیاں خیربکش ءَ مں سُھریں سلام
پہ بابائے (خیر بکش) یاتاں گوں اَڑس رِشاں
رِشاں اڑس چو کے شنزِت جینٚہراں
تہ باتئے سلامت مئے کوہ ءِ سلیمان
اِید ءَ ہئور گواراں سُہیل ءُ زمستان