مہتل نہ بیت داں پلیں زندمان ءِ راز دار بیتیں
گوں مراد تنیگیں ارواہے پہ شوہاز ءِ ودار بیتیں
در گیتکگ پہ آژناگی من ءَ آژناگے نہ شوہازیت
وت ءَ در بگیجاں باندات ءَ بلکیں پہ وداربیتیں
اندر ءَ شپ تہاری ءِ بیتگاں لگتمال ساہگ ءَ جند ءِ
چراغے بالینتگ بشنگی رژناہی داں بامسار بیتیں
چہ نیاز مندیں دل ءِ اومان ءَ پہ شیداہی بہ نال انت زہیر
داں ودار ءِ رہسراں املّ ءِ سنگہانی توار بیتیں
وتی گمیگ ءَ پیشداشتگ دور ءَ رنگ داتگ
دگہ رنگ ءَ رنگ زرتگ اگر پہ گدار بیتیں
شپ تہاری انت ماہ ماں جمبراں اندیم
روک کن اِت کندیل ءَ رژن ءِ شیدا بے کرار بیتیں
بے رائیں گرّ ءُ چیلاں روچ ءَ بگوٛازین ئیت
مرچیگیں روچ دنز ءُ تامور ءُ غبار بیتیں
وہد ءِ پاسپان نیلنت دربیاہاں آس ءِ آترٛاپ ءَ
دیدگ راہیگاں دوستے درد ءِ اسرار ءِ آشکار بیتیں
میر ؔ کپیت ترانگ ءُ یاتاں تلاہیں گال سنگاریت
زنزریت بلکیں تیر چہ دیدگانی خُمار بیتیں