منی کہ ھمسفر انت نیکیں ھر دعا ءِ وڑا
پمیشکا مرچاں وتا لیکیت آ خدا ءِ وڑا
پدا فرعون ءِ گس ءِ دْروگیں مار زند ءَ دجنت
کجا چہ بْیارآں دیہے موسٰی ءِ عصا ءِ وڑا
من گار باتاں تئی کلکشان ءَ گیوار ءِ
کہ بلکیں سرباں دل ءِ آزمان ءَ ماہ ءِ وڑا
مدام رپک ئی دگہ گوں درآمدانی وڑیں
مبات بہت ءَ کسی راج ءِ رہنما ءِ وڑا
اگاں کہ کور اَنت بلے چم پچان ءَ ریپینت
دگہ نہ گندآں چوشیں رہبرے تماہ ءِ وڑا
دلانی حالاں حدا زانت یا بزان ئے وت
بلے اے ماہگر ءَ گپتگ یئی نما ءِ وڑا
صؔبا اے شال بدن پلیں زہبر اِنت ستر
بلے نہ گندآں دگہ شیریں ماہ لقا ءِ وڑا