نہ پُلے ارسانی دامنءَ کپت نہ دُعایے چمّانی مُستجا بوت

نہ پُلے ارسانی دامنءَ کپت نہ دُعایے چمّانی مُستجا بوت

اے اہدءِ پیشانیءَ نہ پہم اِت زمین پہ سُجدگے رضا بوت

یَہ مُدتیءَ تئی مہر پمّن کپوتے اَت موسمءِ کدوءَ

نہ منت ودارءِ آ دْرچک سبزیں ءُ دل زہیراں گوں آشنا بوت

تئی یات بندیکیءَ کماتنت چو تزبیءِ مُہرگاں شیروکیں

پدا ہمائیں دلءِ کپودر گمءِ پکیرانی ہمسدا بوت

نہ رِتکگ اَت سُرمہ دانیءَ شپ، نہ مئیم چمّانی ہُکہءَ اَت

بلوریں نازینکیءِ نِوانءَ چراگیءِ زندگی سبا بوت

گوں ہون ءُ ہوشامءَ مینتگ اَت دل، نگاہاں دریایے لُڈگءَ اَت

پہ جلّگءَ ساہگے نِوان اَت نہ جُنزگءَ توکلے منا بوت

من دوشی تئی تْرانگاں گوں وپتاں ءُ سُہبی سرجہءِ پُل سْرپتاں

سمین دروازگءَ جنان اَت شمءَ شِپیں لنکُکے درا بوت

چے پئیم اوستانی سوچنءَ گوں زمانگءِ دامنءَ بہ ترکاں

اے شنگیں امروزءِ پیچ ءُ تاباں نزاناں بندیکءِ سر کجا بوت

نُوں اُودا بس تْرانگانی دَمکءَ ماں ساہگءَ ایوکی پتاتگ

ہمودا سْرپتنت تئی جیگیءِ پُل ہمودا گْواتءِ سپر بنا بوت