نئے سِتک سراتکہ نئیکہ ایمان سراتکہ
گنجے کہ منی ڈولیں مسلمان سراتکہ
ارواہ ءِ ہماگین کہ بخشیت سباہے
ارواہ ءَ ہمابستگیں ارمان سراتکہ
توکل کہ ہمک نیّت ءِ ہمبازی ءِ مستاگ
ہمت کہ بنی آدم ءِ بس شان سراتکہ
نے آس منی سینگ ءَ پشت کپتہ تلاہیں
نئے آپ منی دشمن ءِ چمان سراتکہ
نئے حُب اوں زمین ءِ ءُ نکہ دوستی اوں راج ءِ
حیران اوں چتور ءَ منی بولان سراتکہ
نوں نئیکہ بہارؔ اِنت ہما واہگ ءِ دمبا
نے ہمبل ءُ بیلانی آ دیوان سراتکہ