ماتیں وتن مات گلزمین
تو جوانیں چُک پیدا کتگ
کہریں زمستانی شپاں
کندیل نہ مرتگ روشنیں
ہلکوءِ گران نازیں جنک
ءُُ نیم اُمریں زالبول
تئی پانگیاں اتکگاں
ماتیں وتن مات گلزمین
’رد داتگاں گرم ءُُ لوار
آستینک سہیل دیمپان کتگ‘
نازینتگءُُ جی جان کتگ
لیلوءِ جاہ لئیکو جتگ
ارس تئی انارکاں رتکگاں
گراں مہزبیں جیگ میسِتَگ
تو کپتگ ئے دیر ترانگے
گنداوہءِ دنز ءُُ مجاں
آ رند ءُُ لاشارءِ گماں
وت ماں وتی جنگ ءُُ مِڑاں
دستوں وتی چماں جتگ
ماتیں وتن مات گلزمین
آ کول ءُُ شرطانی پدءَ
جاڑو جلب نام آوریں
کُشت تاسبیں بچءَ وتی
انچو مریدؔ دیوانگیں
پَشّمبےءِ سہبءِ سرا
اتک لانگوانی مجلسءَ
گُشت ءِے بلوٹئت لانگواں
او لانگو ءُُ لوڑیچھاں
من شے مریدؔ داد دیاں
لانکءِ بَروکیں خنجرءَ
جتکاں گوں جاڑیں مادگاں
تہتاں گوں زرّیں پادگاں
مال ءُُ متاہاں سرجمیں
سیبیءِ ٹگیں لانگواں
گُشت داد دُنانی ہانک اِنت
جی پہ مرید کولءَ تئی
دشتار بکشئت ٹیٹلیں
شیہکءِ میریں پُسّگءَ
راجدپترءَ نام نوک کت
ماتیں وتن مات گلزمین
آ کرن ءُُ آ باری شُتنت
کُوکُو کپوتانی توار
زیمیں دلءَ تاہیر نہ دات
گیابان ءُُ کوہ ءُُ کوچگاں
ہر نیمگا آسے بلیت
بمب ءُُ تپنگانی توار
گوارنت گُشئے تیرانی درد
پنجابءِ جنگانی گراب
اُرشءَ گلائش انت مدام
کوہلو ءُُ بارکھانءِ سرا
روک انت گہیں دشتءُُ بُگان
سیاہ ستکگنت ہند ءُُ گدان
ماتیں وتن مات گلزمین
تو بے کس ءُُ لاچار نئے
سد مہربا بچّاں تئی
لبریشنءِ نوک پُسّگاں
تراتانیءِ شیریں نراں
سالونک نوابیں اکبرءَ
بالاچءِ مردی توکلءَ
مُرگاپءِ شیریں ہمبلاں
اللہ نزر جانءِ وڑا
دلجان ءُُ ڈاکٹر خالدءَ
بیلاں سرا بستگ کپن
بگٹی، میار جلیں مری
کلیں بلوچ اَنت اِتپاک
ہم پنت ءُُ اے زوراوراں
سندنت گلامی سانکلاں
آجوئیءِ روچ ٹِک کنت
ماتیں وتن مات گلزمین
ماتیں وتن مات گلزمین