پاداں بندیکے اَڑان اِنت گْواتءِ

پاداں بندیکے اَڑان اِنت گْواتءِ

کانچیں بالاد پْرشان اِنت گْواتءِ

کئے شِپیں بوجیاں بہ پہریزیت

آس دریاءَ بلان اِنت گْواتءِ

شِنگ کنان اِنت گْوپتگیں بیکاں

چاڑ نُوں شور گِران اِنت گْواتءِ

سر جنان اِنت مُدام دَمک ءُ دراں

ہلک بے ڈس ءُ نشان اِنت گْواتءِ

بیا وتی صورتءِ سنجءَ مین ئے

شار بے رنگ بوان اِنت گْواتءِ

کاروان الّمءَ چِدا گْوستہ

دامن اوں دَنز چنان اِنت گْواتءِ

ہورءَ گْورتہ زمینءِ دلبندءَ

کِشتگیں توم ردان اِنت گْواتءِ

ماڑیاں بُرز بران اَنت شہرءِ

دابءِ آدینک پْرشان اِنت گْواتءِ

اُودا ہر رو مں تْرانگاں شوداں

اُودا شہکور تلان اِنت گْواتءِ

ہُشکیں تاکانی ذردُکیں زیمر

پاداں پادینک دیان اِنت گْواتءِ

است چمّے، نہ چراگے، ماہے

شہرءِ اندام مُجان اِنت گْواتءِ

لُڈّگءَ اَنت دریگ ءُ دروازگ

لَہمیں نازینکے پدان اِنت گْواتءِ

کسّے نشتگ اِدا گشئے عادلؔ

مہپراں مِسک مُشان اِنت گْواتءِ