مں اِش کُناں اِزمءِ کوہ دیماں،
کَسےءِ شعرءِ رَجَگ دگہ یک زُبانےءَ اَنچُش اِنت
چو کّسے یَہ شوکیں سَیدے بہ جنت
ءُ شاہان ئِے لوگءِ دیمءَ وتی بہ دْرنجیت۔۔
رَجَگ نزاناں۔۔۔بلئے ہمے شعر باز رندءَ رجانک کنت دیمءِ مردمءَ را
ہزار درور۔۔۔منی زمان ءَ، منا چہ پیسر
نزار ءُ سُہراب یا نروداءِ گُشتگیں شیرکنی، ملوری
پہ یّک زُبانےءِ موسمءَ باز شاھگان اَنت
منی اوں بولیءَ درد ءِ نازینک
مہرءُ قہرءِ زمین ئیں گفتار بے بہا ینت
وپا ءُ تاسءِ بہشتیں اسرار بے بہا ینت
پمشکہ ہردیں سما بیت ____اے شعر من بہ گُشتیں
"اے درد کہ، چُش بیان بوتگ۔۔۔اے درد وَ سر تا پا منی اِنت
اے دوستدارءِ ستا کہ بوتگ...منی وَش آثارءِ چہرگءَ جنت
اے ہاک سبزیں کہ حونءُ شِیرءَ گوں لیلواں کنت ہَست ءُ زندگ،
منی اوں بالادءِ ہاک ہمیش اِنت"
تہ من زُبانءِ تمامیں تئیلاں
ءُ لبز ءُ معنا ءِ بندش آں چہ سِداں___ جتا باں
ہمے سُبّکیں ملار ءُ مارشتءِ شہرءِ دلبندءَ ایر کایاں
ءُ دست داراں گوں ہم گَمیں یارےءَ، دَریگ ءُ دَرانی پُرسءَ
یا گْریواں شہرےءِ جِیگءِ درداں
ہمے کہ شعرے منی تہہءِ موسماں سُرینیت
ہمے کہ ازم ءَ را اینچو ہاٹیگ بی---منی جانءِ سبز ءُ سُہریں رگاں سُرینیت
تہ من زُبانءِ تمامیں تئیلاں
گْورءَ ءُ پادءَ دیاں تہہءِ بیتواریانی
چو ڈَّکءَ بوجاں تمامیں بوگاں۔۔۔کَسےءِ شادابیں (دستءِ بے وابیں) لَنکُکانی
ہمے ملوری منی شُبین اِنت، ءُ سبزیں بچکندے دیمءِ پّجار اِنت، گام گامءَ
دگہ منا نیست رَنگ ءُ ڈّس یے
دگہ منا نیست شُناس نامہ