ہما چمّ اَنت
خمار ءِ رہسرءُ راہاں منی تُنّ ئَ
برے کیف ءُ برے ہوشام بخشا اَنت
پہ نام ءَمہر ءُ دوستی ءِ
غُباراں ریگزارانی
من ءَدریا کنگ لوٹ اَنت
ہما بُروان
کمان ءِ سرپتگیں تیر اَنت
چو خنجر تیز ءُ بُرّوکیں
اے زند ءِ کوہنیں جنگ جاہ ئَ
گوں وھد ءِ شہسوار ءَجنگ دیگ لوٹ اَنت
ہمک پروش ءَمن ءَسوبمند کنگ لوٹ اَنت
ہما رُخسار ءُ لب شیریں
کہ گپ ءُ کندگ ءَپیسر
جڑشکاں بنت ماہکان ءَ
اے زند ءِ شپ جتیں راہاں چوڈیوائَ
ہمک توپان ءُ گوات ءِ دیم ءَدُنیا ءِ
من ءَرا روک کنگ لوٹ اَنت
ہما ہاں من
تئی شاعر ، تئی شیدا
وتی ہرگال ءُ گُپتارئَ
وت ءَگوں جلوہاں ہمگرنچ کنگ لوٹاں
ہمک ہم دروشم ءَتئیگ ئَ
تئی نام ءَدیگ لوٹاں