آس گُلباگءَ سرپنت سُج، کمیر،
نور تالانیءَ سبزیں پوشاک
پُٹّہ یے چِست بیت کوہانی سرا
آپ زوریت زِرءَ
آستونک شہم گِرنت
زاگ بنت جوہان مُجیں یاتانی
میزریں بست، ہُدا گِندیں ڈگار
پودنت پُلّس
گواش بُگ ہیر کلمپر گوارنت
کائمیں مہترے ننگارءِ بُنا
جنت لداں، کنت دُشاہانی سرا
جمبریں گوزاں سوچیت
برز بالائیں کہور بنت چو جُگءَ
ایر بنت لاگریں گوکانی سرا
پَلکیں ہَرِن پول گرنت
کیلّگءُُ بستاں شومنت
رِہت بنت شاگیں شَتنگ
چہر بیت چیریں زُبانگ
پہ شُبیناں چہریں،
دہل کِشیت، پَل کشّیت
پہ اے اُمّیتءَ کہ سبزیت گیدی
چِلّہءَ کنت پدیگ
گرّ لِوارءَ چاریت
آس کنت گَمرہ
رُدیت گبّ ءُُ گرءَ
کپیت چُک ءُُ برءَ
دل تئی اُمّیتءِ نگہپان
بگندئے سبزیت،
بلکیں بے موہیں زبان ہار بہ کنت
بلکیں ہنکاپی بہارے پدا تیجار بہ کنت