بلوچ یکجھتی کمیٹیءِ بندیگیں مَھرنگانی نامءَ
بلوچ یکجھتی کمیٹیءِ بندیگیں مَھرنگانی نامءَ
مھرنگ بلوچءِ گُڈی اوست
مھرنگءِ لوٹ ءُ گَزر٘ چے؟
مھرنگءِ تھاں کارپد
چہ دستورءَ در اِنت؟
مھرنگ وتی ھکّ ءُ ھِسابانی گَواہ
مھرنگ بلوچءِ مُھکمیں گْوانک اِنت کہ تالان اِنت کُنڈ ءُ کِشوراں
مھرنگ بلوچءِ ننگ ءُ نامُوسءِ سوال
مھرنگ بلوچءِ دلجمیں اِیمان کہ ایرجیگ نہ بیت
مھرنگ بلوچءِ لیکہ ءُ فکرانی
آدینک ءُ شُبین
مھرنگ مانیت تاں ابد
مھرنگ بلوچءِ مڈّی اِنت
مھرنگ راجءِ دیدگ اِنت
مھرنگ کوہءِ چیدگ اِنت
مھرنگ اھدءِ راستی اِنت
راستی چو روچءَ روشن اِنت
مھرنگ جُھدانی بر اِنت
مھرنگ سوبانی بشارت زاھر اِنت
مھرنگ بلوچءِ پُسّگ اِنت
مھرنگ بلوچءِ دُتّگ اِنت
مھرنگ بلوچءِ گیدی اِنت
مھرنگ بلوچءِ بی بی اِنت
مھرنگ بلوچءِ گودی اِنت
مھرنگ بلوچ یکے نہ اِنت
یک بو٘لک ءُ ٹَکّے نہ اِنت
مھرنگ بلوچءِ گلزمین
مھرنگ بلوچءِ سنج ءُ دْرین
مھرنگ بلوچءِ گوھر اِنت
مھرنگ بلوچءِ جوھر اِنت
مھرنگ بلوچءِ دودمان
مھرنگ بلوچءِ زندمان
بھتامءَ کوہ ئیگءَ مجن
کوہ ھم پہ مَھرنگاں زریت
مھرنگ وت کوھے پہ تو
"سر ندْر" ماتی گوھر اَنت
زاننت گَشانءِ مَنگِھءَ
زاننت وتی نیک ءُ بدءَ
"داعش خُراسان" تو وت ئے
بے پردگیں بَیھار دئے،
ھرچی کہ گُشتہ، کُت کنئے
انگت چد و گنتر کنئے
تانکہ بگندیت شر ترا
دنیا کہ چارُوگ اِنت تئی
گندیت تئی دھشتگردیاں
رندا پدے پِر بیت ترا
شِر پاشک بنت تئی زاھرا
رَندا جھان پِرگرد وارت
نئے چو ترا آہ سَرد وارت
مھرنگ ھڈّے اے بری
تو چو کُچکءَ دپ جتگ
ناں ایر رؤت ناں درکپیت
مُنجینتگ ے ارواہ تئی
پونزءِ سرا اِنت ساہ تئی