دیدگاں گوں ناز شانیت، پہ اَدب بچکند کنت
ترٛانگانی نیپگانیں دل زہیر اِشکند کنت
جی پما روچاں کہ ہِنّی پاد گوں دستاں سنگہیں
کیت در ءُ دَروازگاں جوریں دِلانی بند کنت
عشق چے زاتے نہ زاناں، مِہر چونیں حاکمے
آدمی زات ءِ ہمک بند ءَ وتی پابند کنت
مئے گنوکانی حیال ءِ پرٛشتَگیں تحتء روان
تئی گِس ءِ دیما نہ زاناں روچے چینچو رند کنت
آزمان بندیت تَنکّ ءُ سارتیں نودی جمّرے
آ سرءَ شودیت ءُ زوریت لنککاں سر رند کنت
پہ منی اِمروز ءَ تالاں کنت بہشتی موسَمے
آ منی راستیں کش ءَ نندیت چماں بند کنت
دل تاں ممتاز زِندگ اِنت داریت دردءِ دامنءَ
چم تانکہ دیست کنت، اَرسءَ وتی وازمندکنت