ارس بدینگ بوتین اَنت
حون شلینگ بوتین اَنت
تو بانور بہ بوتین ئے
ہنی مینگ بوتین اَنت
من ہم کمیں بود کتیں
غم واپینگ بوتین اَنت
پاداں ہمراہ داری کت
دست سُرینگ بوتین اَنت
ما اوں وابے مانا کت
شپ تُرسینگ بوتین اَنت
تہلیں جؤرانی برورد
شالا بینگ بوتین اَنت
ما روچانی زنگ نہ جت
شپ نازینگ بوتین اَنت
گوں کاٹاراں لئیب کتیں
انچیں سینگ بوتین اَنت
مہر ءُ وفا انچیں گپ اَنت
کست ءُ کینگ بوتین اَنت
پہ ما زمین جمب ءَ چے گوں
دل لرزینگ بوتین اَنت
قاضیؔ شعرے پر بستیں
درد کدینگ بوتین اَنت