بگش کہ مرچی شپ اِنت برات ءِ
منا چہ غیب ءَ گُماں بوتگ
من فکر ءِ چاریں رُکات ونت اَنت
بِلے من سُر سُر نہ کت زمین ءَ
پہارے چست بوت منی جبین ءَ
من جیڑگاں گوں روان بیتاں
گشے منا کسّے لوٹگ ءَ اِنت
تو ہرچی لوٹے بلوٹ مرچی
شپ اِنت برات ءِ
من کلہے جیڑ اِت ’’شپ اِنت برات‘‘ ءِ
چہ مگرب ءَ گر داں رودراتک ءَ
پَرشتگانی رم اَنت کتار اَنت
تمامیں خلقت مں سجدہ ءَ رؤت
پدا درود ءُ سلام واننت
شپ اِنت برات ءِ
گوں بکملیں بانزلاں
خمار اِنت ”داؤد“ گوں رباب ءَ
ءُ ”موسٰی“ ءَ را عصا اِنت دست ءَ
شموشیت ”یعقوب“ ”یوسف“ ءَ را
شپے اے انچیں کہ باز کرزیت
”بلال“ بندات کنت اذان ءَ
شپ اِنت برات ءِ
”امام مہدی“ کتار بندیت
بگندئے ”سرتاج“ آہگ ءَ اِنت
گوں چاریں یاراں
اے کل دستاں کننت بُرز ءَ
بدئے کہ واجہ تو بادشاہ ئے
بہ شنز واجہ بگْوار واجہ
شپ اِنت برات ءِ