نہ تْراں کننت برمش نہ آواز کننت روچے
آپ سمّاک ءَ جتگ، انسٹیٹیوٹ آف بلوچیا، 2019
شِنگ کن:
نہ تْراں کننت برمش نہ آواز کننت روچے
ارواہ منی تاہیرءِ گماں ساز کنت روچے
انوں جگر ءَ تلملیں کاٹارے پکار اِنت
کم کم ءَ اگاں باز کنئے باز کنت روچے
پد رنداں گسر کپتگیں گیرانی مافر
بلکیں ترا یک ترانگے شوہاز کنت روچے
اے روچ کہ ہمروش زِر ءَ ایر روان اِنت
رژن ءَ وتی تہنائی ءِ امباز کنت روچے
وئیلے کہ دل ءَ عمر ءِ درچ ءَ گون جنان اِنت
کرکینکیں دل ءِ بے وتی ءَ گواز کنت روچے
چمانی جگر زُرت نہ کنت شیرمچیں ارساں
قاضی اگاں کونڈاں مہ کپیت واز کنت روچے