مِہروانیں شپ

بیا او مِہروانیں شپ

بیا پہ تو وداریگاں

دلبریں شپ ءِ مِستاگ

زِندگی ءِ طِفلیں دل

بے تو چینچو پُرسیگ اِنت

بیا کہ راہ سراں تئی من

حون ءِ جوہ تاچیناں

من پہ جنّتی حُوراں

بِہہ دل ءَ نہ رنجیناں

بس تئی زہیراں گوں

اے دل ءَ را سہڑیناں

بَید اَچ منا دیدگ

بَزّہ کاریں مُزّوراں

تئی شِپاریں زُلفانی

شِنگگانی پکّار اِنت

تئی لقاء ءِ دِیدار ءِ

ساعتی ءِ دَرکار اِنت

بیا او مِہروانییں شپ

بے تو واریں دِہکان ءِ

بہر ہم برگ بوتگ

دیدگانی مہررنگیں

واب پَچگِرگ بوتگ

زِندگی ءِ نازاکیں

داب پَچگِرگ بوتگ

بیا او مہروانیں شپ

مہلقائیں کاڑانی

جیگ بوتگ اَنت تل تل

نیم وابیں چماں کہ

شنزیت دائم ارس ءِ شل

سمبہگ ءُ سینگار ءِ

روچ بوتگ اَنت مہتل

بیا کہ گاریں بچاّنی

مات بوتگ اَنت پُرسیگ

بانُکیں گُہارانی

برٛات بوتگ اَنت پُرسیگ

بے ترا اِے اِمروز ءِ

گوٛات بوتگ اَنت پُرسیگ

بیا کہ بے تو بنیادم

وہد ءِ دوزہیں روچ ءِ

اَنگریں اے برٛانزاں گوں

سُتکگ ءُ کباب بوتگ

بیا او مہروانیں شپ

پُل بِلّے پَچ پُلّنت

کہ بہ شنگیت اِمروز ءَ

گوٛاڑگانی بوہ ءُ باس

بِلّے دوزہیں روچ ءِ

گار بنت قہریں آس

بیا او مہروانیں شپ

من کہ بے تو دل ریشاں

باز دیر اِنت بے واباں

بیا او مہروانیں شپ

زند بے تو ویران اِنت

تانکہ اے جہان اَست اِنت

یات تئی نمیران اِنت