جی منی دابانی شلی شریں
پلگدیں شاری ءُ تلاہ زرّیں
نوں مریچ ارساں گلگل ءَ پمن
چہ منی راھانی سر ءَ پادا
نوں مہ گوْپ پنگ ءُ زامریں بیکاں
نوں مکن چماں سرمگ ءُ کنجل
نوں مکن داب ءُ نوں مپوش ادلس
کِرمزیں لنٹاں ءَ مکن آمڑ
نوں مجن پن ءَ کاگدیں رکاّں
مھلب ءُ وشبوآں مہ مال جان ءَ
بخملیں کوشان ءَ مکن پاد ءَ
لنککاں ماری ماں مکن مندریگ
دُرّ مکن گوشاں ءُ باھو بند باسکاں
شانک مدئے پمن کدّھیں چماں
نئے ژلانگیں نوں پاد ءِ پادینکاں
واھگاں ایرموش ماں دل ءَ پُلّیں
ایر بہ بر زپتیں ترانگاں زرد ءِ
نئے زھیر یگیں تو بجن ھالو
نئے بہ نند کل ءِ بانڈم ءِ دیما
نئے بہ کشّ پمن سارتکیں گین ءَ
نئے بہ زر پمن نئے بہ بند پھر ءَ
نئے پمن دل دوستوں منی ھیسکار
نئے پمن پیغام گوں بکن گوات ءَ
نئے کلہہ گوں کن ماہ ءُ استاراں
نئے نپر کن تو جمبری ساچان
نئے پمن راہ دئے قاصدے دیریں
نئے بجن ٹاکور ءُ شگاں زپتیں
تو منی اندوھاں بکن بیھال
ماسگاں بند ءُ نئے بدئے گوندو
تو شموش امبازاں امیریناں
شرکنیں گپ ءُ وادہ ءُ لبزاں
ھوش بریں نیاد ءُ داتگیں قولاں
کش ءُ ولگوج کن چہ دل ءِ بنداں
تو منی اوستاں گوں اومیتیناں
کن منا چو پیشی کسّہ ءَ بے ھیال
تو منا چو بوجیگے زر ءَ اوگار
آس بدئے منی ڈیل ءَ چو مرتگیں کک ءَ
چو بکن تیجار ءَ منا آدرہ
چو ڈنگر ءُ گور ءَ زیر منا ماندار
تو منا چو سیسیگ ءَ کن شکار کوھاں
ماں گریشگاں دیریں کن منا وانڈہ
ترونگلیں ارساں نئے بے ریچ پمن
نئے پمن جیگ ءَ تر بکن پلّیں
نئے دل ءَ جیڑ ءُ نئے ببو آزار
نئے وت ءَ شنکاں پمن آسیگ کن
نئے وت ءَ تاباں کن پہ منا سھتے
من چہ تئی باگیں کشور ءَ رفتاں
من چہ تو دور بوتاں ھزار میل ءَ
پشت ءَ دریاہ ءُ دیر دراں ڈیھ ءِ
من چتو سِستاں ءُ جتا بوتاں
تو نہ بوتئے ءُ من بد وپا بوتاں
چو کؤر ءُ شیپانی اے سر ءُ آسر
نوں اگن ھچ پیم ءَ پدا نیاھاں
من پتو زیک ءُ گوستگیں روچاں
من پتو گھگیر ءُ ھیال کوھنیں
من پتو اوماناں کسانی ءِ
من پتور مھرانی زھیر آسیں
من کلاتے آں پرشتگ ءُ بندیں
من پتو پیرینی وتی قبرے
من پتو اوپار ءُ ساھگریں صبرے
من پتو عھدی گشتگیں گالے
من پتو ھاکاں رتکگیں لالے
دوست اتئے ساہ ءُ دیدگاں گیشتر
تو منا دوست چہ عالم ءَ گیشتر
پہ چنڈگ یے نان ءَ من ترا دروھِت
من ترا یل دات پہ بے نپیں سیت یے
چوں گشاں پتو من وداریگاں
کئے گُشیت جند ءَ من میاریگاں
چوں ترا ماھگل من دل ءِ لیکھاں
نوں چتور شیدائیں سر ءَ بکشاں
گونڈلیں تیراں چوں من چکاّساں
وتی عاجز ءُ وھلیں ڈڈر ءَ پیریں
نوں پتو باھند بطلیں گپ یے
نوں پتو دیمپانی گونڈوئی واب یے
چوں پتو کایاں ءُ کناں امباز
من کماشان ءُ تھت ءِ باھوٹاں
تو ھُدا وند ءِ نوں پناھائے
تو میارئے نون قادر ءِ شاھیں
من پتو ھچ چیزوں کت نہ کت زندءَ
نئے پتو تاب ءُ زحمت یے کش اِت