اے خُدا وندا بلوچان ءَ چُشیں مردم بدئے
پُر دماغ ءُ جانثار ءُ زندہ دل روشن خیال
فکر آوانی بہ بیت چو تازگ ءُ وشیں چِرّک
عقل چو سبزیں زِر ءِ پُرشوکتیں جاہ ءُ جلال
سر بہ بیت خالی چہ کوٛہنیں قِصّہ ءُ رسم ءُ رواج
دپ بہ بیت خندوک آوانی پہ ہر رنج ءُ ملال
دل بہ بیت مضبوط چو شتکیں تلارے مں زِر ءَ
بیم ءُ ترسے ہچ میاریت پر دل ءَ گوات ء شمال
اے خُدا وندا بلوچاں مں جہان ءَ زندہ کن
دشمنانش گم ءُ گار ءُ پُرٛشتگ ءُ شرمندہ کن