تں کدین

تں کدیں سنگتاں! اِے نِندگ و چارگ تں کدین

تں کدیں چمانی بندگ، دِلءِ دارگ، تں کدین

تں کدیں گِندگ وَتی مِہتگ و پَلانی زِراب

تں کدیں مئے سرءَ بمبانی گوارگ، تں کدین

تں کدیں لٹ و پلءِ جلگم و تیلانک و گھزب

تں کدیں لج و مئیارانی پتارگ، تں کدین

تں کدیں پاھو و زندان و ملام و شلاک

تں کدیں ٹپاں وَرگ، دست نہ شہارگ، تں کدین

ظلم حدءَ چَہ وَتی گوئستگ و نِین سگ نہ ببت

تں کدیں دِل جنئگ و ظلمءِ نِدارگ، تں کدین

ھَلہ بیلاں! نِین سِرین بستگ و چاڑِ کہ ببہت

تں کدیں بستہ دپءَ، گپ گوں اِشارگ، تں کدین

چاپ زھماں گوں جنئگ، بِیتہ شمے کار مدام

تں کدیں دشمنءَ، ننگانی سپارگ، تں کدین

دشمن اَبرسِتگ و مَلان اِنت، گرئندان و شَلان

تں کدیں بِراتانی ڈونڈانی سوارگ، تں کدین

دِل و دستاں وَتی ھمراہ بکنہت، در بِکپہت

تں کدیں ھِیزی گمانانی گمارگ، تں کدین

مَرچی ماتی وَطنءِ لج و مئیارءِ گوانگ اِنت

تں کدیں لج و مئیارانی مَمارگ، تں کدین

سنگتاں! گالاں نصیرءِ مشموشہت کہ گوئشیت

تں کدیں وَسپگ و بیران نہ شمارگ، تں کدین